Porque é certo que a importantíssima modificaçom dos Foros bascos que arranca da lei de 25 de Outubro de 1839 (alfándegas na costa, supressom do passe foral, Administraçom de Justiça à espanhola) conduzirá à mudança radical que supom a inclusom do mercado basco no mercado espanhol e fará possível o enganche da minaria basca como fornecedora periférica do Império Inglês, que, de resto, é a potência hegemónica da economia-mundo. A drástica baixa dos impostos forais sobre a venda de mineral, em 1 de Janeiro de 1863, fijo saltar a produçom de 70.000 toneladas para 120.000 num só ano. E a aplicaçom da lei espanhol de Minas de 1868 que ainda embaratece mais os impostos à exportaçom provocou outro pulo, de 250.000 toneladas em 1870 para 400.000 em 1871.
E, em segundo lugar mas nom menos importante, esse específico enganche que as mudanças que arrancam de 1839 facilitam com a economia do Império inglês (e que depois jogará como causa exógena e principal da industrializaçom basca) está acompanhado polas específicas ajudas que essas mudanças suponem para quem serám o factor endógeno dessa industrializaçom: a burguesia basca que depois se converterá em basco-espanholista. O facto endógeno dessa industrializaçom vai ser a existência de umha prévia acumulaçom de capital mercantil e a conseguinte existência de umha burguesia capitalista mercantil (e parcelarmente industrial) que será a condiçom necessária para que, a diferença do que aconteceu na Andaluzia ocidental, o espólio estrangeiro da riqueza mineira facilite a manutençom sustentado da industrializaçom basca.
A burguesia basca poderá desempenhar esse papel precisamente porque se produzírom após 1839 mudanças profundas nos Foros. E dessarte essa burguesia basca, cuja acumulaçom de capital mercantil lhe achega liquidez monetária suficiente, consegue arrebatar ao povo basco a bacia mineira biscainha tomando posse, por preços ridículos, das terras municipais e concelhias, das terras de propriedade comunitária do povo basco da zona mineira do anticlinal de Bilbau no período 1841-1870.
Darei apenas um exemplo que é particularmente demonstrativo: a ridícula quantidade de 51.081 reais é o miserável preço que cobrou a vila de Portugalete polos seus direitos num proindiviso sobre os montes de Triano em 23 de Outubro de 1858. O comprador foi Dom Juan Maria de YBARRA, cuja família será sócia da companhia Orconera e Franco-Belga e possuirá os mais ricos cotos mineiros como o demonstra o facto de que em 1890-91se extraísse 45,5% do mineral biscainho das 35 minas da sua propriedade, que eram só 1 ou 28,5% do total das minas produtivas biscainhas.
É certo, repito, que a profunda modificaçom dos Foros que arranca de 1839 tivo importantíssimas conseqüências. Mas nom será até 1876 que se produza umha mudança de classe dominante no País Basco e nom será até essa data que as massas rurais bascas fiquem derrotadas de vez. Quando a contradiçom principal que atravessou os primeiros três quartéis do século XIX basco (a redistribuiçom da propriedade da terra, a nova conceiçom da propriedade e da produtividade agrárias, a conseqüente profunda modificaçom agrária) se resolva com a derrota das massas rurais bascas.
10. As guerras carlistas e a derrota das massas rurais bascas.
|
|
|